viernes 10 de mayo de 2019 - 19h
Nicaragua: a cuarenta años de la revolución
En xunetu d'anguaño va cumplise'l cuarenta aniversariu de la insurrección popular dirixida pol Frente Sandinista de Lliberación Nacional (FSLN) que punxo fin a la dictadura de Somoza en Nicaragua. Remató d'esta manera un procesu pa tomar el poder que tuvo repercusiones fondes nos demás países centroamericanos (guerra n'El Salvador y Guatemala) y a nivel mundial.
A lo llargo d'una década, la Revolución Popular Sandinista intentó construyir un modelu nuevu que reconocía'l pluralismu políticu, la economía mista y l'antimperialismu, daqué qu'en plena Guerra Fría los Estaos Uníos nun taben dispuestos a dexar. Por eso desencadenaron una verdadera guerra, armando y financiando a la contra.
El procesu de paz d'Esquipulas llevó a unes elecciones en 1990 onde'l FSLN resultó derrotáu. Dende entós, Nicaragua entamó un procesu de vuelta a les estructures económiques dominaes pol imperialismu. Nestos años, el FSLN caltúvose como principal fuercia opositora hasta retornar al poder pela vía electoral nel añu 2006, calteniéndose nel gobiernu hasta güei.
Sicasí, nestos años el sandinismu foi modificando los sos oxetivos políticos afaciéndose a una llucha por caltenese nel poder. Pa eso arrenunció a bona parte de la so identidá pactando colos herederos de la contra, cola xerarquía católica, almitiendo les propuestes económiques neolliberales, etc.
Va un añu empezaron una partida de movilizaciones populares en contra del gobiernu del FSLN que foron reprimíes duramente y despreciaes dende'l poder. ¿Cuánto hai de vieyo y de nuevo nel sandinismu actual? ¿Cómo pue esplicase que quien ayeri impulsaron una insurrección popular güei repriman duramente a quien denuncien nes cais la deriva autoritaria del sandinismu? ¿Ye posible reducir el descontentu popular a una conspiración imperialista? ¿Qué salida pue ufiertase a les aspiraciones populares cuando s'afrellen cola política sandinista?
Intervienen:
Yerling Aguilera - Feminista de l'articulación de movimientos sociales
Jimmy Gómez - Articulación de movimientos sociales
Presenta:
Tino Brugos, del Conseyu de redacción de la revista Viento Sur
Entamen: Anticapitalistes y Viento Sur
