Axenda Mazucu

Conferencia:"Sidros y comedies:Una tradición ancestral que venció al escaezu"

CONFERENCIA D'ÁSTURA'L MARTES 18:

PABLO'L SIDRU, DIRECTIVU DE "EL CENCERRU", VA FALANOS DE LOS SIDROS Y COMEDIES DE VALDESOTO RECIÉN DECLARAOS BIEN D'INTERÉS CULTURAL.

ATENÉU OBRERU DE XIXÓN. 19:30 HORES.
Antigua Escuela Comerciu, 2u. pisu, Xixón.
----------------------------------------
Ástura quier dar voz a Pablo'l Sidru, referente na recuperación d'una tradición que, baxo'l títulu de "SIDROS Y COMEDIES: UNA TRADICIÓN ANCESTRAL QUE VENCIÓ AL ESCAEZU" va falanos d'esti viaxe cultural dende'l so orixe hasta los nuesos díes. Esti pasáu 7 de xunu'l Gobiernu del Principáu reconoció a los Sidros y Comedies como Bien d'Interés Cultural de calter inmaterial, aportando asina al mayor grau de proteición patrimonial del país y faciendo mientes espresamente del trabayu de recuperación de l'Asociación «El Cencerru». Una llarga hestoria dende aquel 1857, añu del primer documentu recuperáu sobre esta tradición. La conferencia va esplicar la evolución de los Sidros y Comedies dende'l so orixe hasta l'actualidá, cola llegada de les nueves teunoloxíes y les consecuencies de la reconocencia de recién. Pondráse'l mingu tamién nes actividaes qu'entama l'asociación, sobremanera nel Domingu de Sidros y Comedies y nes Xornaes de Mazcaraes d'Iviernu, asina como nos congresos y desfiles nos que participa, llevando la cultura asturiana, con muncha brenga, al ámbitu internacional. La presencia de los Sidros y Comedies ye importante en Portugal, Italia y Bulgaria y cuenta con ufiertes pa participar n'Hungría, Brasil, Colombia y Macau. La charra va sofitase con semeyes y documentos antiguos y otros más nuevos, dalgunos d'ellos ensin espublizar.
---------
PABLO CANAL, perconocíu por tol mundu como «Pablo'l Sidru», nació na Rasa, una pequena aldega del Conceyu de Siero. D'oficiu graduáu social, pero sidru por pasión. Dende guah.e diba con so padre a los desfiles que se realizaben na Pola Siero, abiertos siempres polos Sidros, nes fiestes de los Güevos Pintos, vezu que se caltién anguaño.
Tres casi 20 años d'interrupción, n'agostu de 1987 participó xunto a otros vecinos na recuperación de la Mazcarada que se fixo nel so pueblu. Anque esta recuperación duró solamente 5 años, foron de muncha actividá, participando en distintos desfiles d'Antroxu en dellos puntos d'Asturies, asina como na grabación de videos, organización de charres en colexos, sesiones fotográfiques pa la Enciclopedia Temática d'Asturies, etc.
L'añu 2005, en collaboración con dellos mozos de la parroquia de Valdesoto, trabayó dafechu na recuperación de los Sidros y Comedies, y dende l'añu 2006 desendolca un llabor d'espardimientu qu'entamó na Escuela de Faes y llevólu a dar charres en más de trenta centros escolares de toa Asturies al traviés del programa Axenda Didáctica de la Conseyería d'Educación y Cultura del Principáu d'Asturies. Tamién participó en Foros y Alderiques rellacionaos cola Mázcara en Zamora, Lleón, Lisboa, Lazarim, Miranda do Douro y otres ciudaes d'España y Portugal.
Participó de manera mui direuta na redaición de la Memoria cola que s'empecipió'l trámite del Espediente de Declaración BIC pa los Sidros y Comedies de Valdesoto, presentada pola antropóloga asturiana Cristina Cantero. Dientro de la Comedia fizo de Galán, Tontu, Criáu del Ciegu, Diañu, etc., pero, ensin dulda, lo que más-y presta ye revistise de Sidru, la so gran pasión.
----------
© Semeyes apurríes por Pablo'l Sidru: FIMI 2019
© Semeya de Pablo nos Premios Marino Gutiérrez: eventysgallery.es
© Semeya na panera: Pablo Nosti (diariu El Comercio)