sábado 22 de junio de 2019 - 12h
¡Garra la pallabra! Conceyu abiertu del Procesu Batura
"¡GARRA LA PALLABRA!" Llamáu públicu a participar nel próximu conceyu abiertu del #ProcesuBatura esti sábadu 22 de xunu
El #ProcesuBatura nun para: el viniente sábadu 22 de xunu, a les 12h nel Llar La Llegra, va celebrase un nuevu conceyu abiertu n'Uviéu nel que tornamos a convidar a toles persones que se reclamen como soberanistes d'izquierda a activase y garrar la pallabra.
Tres d'una montonera de conceyos per estremaos llugares d'Asturies, volvemos una vegada más a abrir les puertes a la participación nesti Procesu de reflexón y aición que tamos emburriando, dende primeros d'añu, p'analizar la situación del espaciu políticu asturianista y soberanista d'izquierda.
Queremos sorrayar la importancia de la participación, sobremanera de cara a siguir plantegando nueves metes que dependen de la implicación de toles persones que nos tais animando a siguir y qu'acoyistis con ilusión esta iniciativa, polo que facemos un llamáu a aconceyar esti día n'Uviéu pa siguir organizándonos, trabayando a comuña y diseñar los siguientes pasos a percorrer xuntes y xuntos.
Nel orde'l día del conceyu vamos:
- Seguir analizando y desgranando los datos recoyíos hasta entós nesti procesu participativu.
- Trabayar el modelu d'organización y furrulamientu con estayes y repartu de llabores, asina como dir pensando modelos pa financiase.
-Diseñar la metodoloxía de formación que quier centrase na mirada a otres esperiencies de lluches soberanistes nel ámbitu internacional y más próximu n'estremaes estayes de les nueses vides (soberaníes alimentaries, culturales, enerxétiques, estudiantiles...) col envís d'arriquecer el Procesu Batura.
Too esto y de xuru que muncho más va pasar esti sábadu 22 de xunu, dende les 12h, en La Llegra. Esperamos vete ellí, que faigas correr la voz y que, d'una vegada per toes, n'Asturies...¡GARREMOS LA PALLABRA!
Organizado por Batura
