domingo 8 de septiembre de 2019 - 12h30
Asturies tiempu de nós: 8 y 9 de Setiembre soberanistes
Un añu más aporta'l 8 Setiembre, día nacional asturianu y dende Lluchando Pola Soberanía y tres les esperiencies de los años pasaos nun podemos dexalo pasar ensin facer un llamáu a la movilización, pa siguir construyendo Pueblu y pa siguir texendo redes de solidaridá y llucha.
Pal domingu día 8 de Setiembre propiamente entamamos una movilización n'Uviéu baxu'l llema "Tiempu de nós" que va entamar a les 12:30 énte l'Hotel Reconquista d'Uviéu, pa percorrer la ciudá faciendo delles paraes en llugares destacaos nos qu'afondar nel calter de denuncia y vindicación de la manifestación. Darréu de la mani va cellebrase una xinta popular na Plaza'l Paragües, onde vamos aprovechar la tarde pa tener dellos talleres formativos que vos desplicaremos con más detalle más alantre.
El llunes 9 de Setiembre, festivu en tol país, vamos da-y continuidá a la vindicación con una nueva marcha a pie "Asturies nun tien Rei" con salida dende l'apeaderu de Feve en Peñaflor, en Grau. Una ruta circular pela naturaleza de 14km, ensin demasiada dificultá y con salida a les 10:30 y qu'ente otros atractivos discurre per escenarios de combates de la revolución de 1808 asica como peles trincheres y restos bélicos del Frente del Nalón na Guerra Civil Española. Ellí aprovecharase pa xintar y facer un conceyu ente los asistentes nel qu' entamar a pensar qué facer énte los Premios Principiegos d'esti añu.
Estes son solo unes pequeñes pingarates, tai sollertes a les nueses redes sociales onde nos vinientes díes vamos dir asoleyando tola información d'esti Día d'Asturies y les actividaes entamaes dende la Izquierda Soberanista.
Organizado por Lluchando Pola Soberanía
