martes 18 de febrero de 2020 - 19h30
Conferencia:¿Persiguióse l'asturianu nel franquismu?
Este martes, 18 de febreru, a les 19H.30', nel llocal social del Atenéu Obreru de Xixón (2ª Planta de la Escuela de Comercio, cai Francisco Tomás y Valiente, 1), ÁSTURA organiza una conferencia sobre ¿Persiguióse l'Asturianu nel franquismu?Repás hestóricu a la situación de la Llingua Asturiana na dictadura (1939-1976), a cargu de Inaciu Galán.
El ponente va apurrir nesta conferencia una imaxe global de la situación de la llingua asturiana nel periodu de la dictadura de Francisco Franco, faciendo un repás a la ideoloxía que'l franquismu construyó sobre la so idea d'España en rellación a les llingües del estáu y l'aplicación qu'ello tuvo na llexislación creada pa la xestión y represión d'esta realidá multillingüe. La conferencia va tar basada na so tesis «La llingua asturiana nel Franquismu», que foi reconocida con Sobresaliente cum laude y ta propuesta a Premiu Estraordinariu de Doctoráu, onde apaecen casos qu'ilustren la represión llingüística xeneralizada que se vivió nes escueles demientres el Franquismu. Ye tamién tema d'estudiu'l papel del Instituto de Estudios Asturianos (IDEA), asina como la situación de la lliteratura escrita n'asturianu, mesmo n'Asturies que nel exiliu. Sobre la etapa última del Franquismu, la tesis fai una revisión del papel de l'asociación Amigos del Bable, fundada en 1969 y pieza clave pa entender l'apaición en 1974 del asturianismu modernu que supón Conceyu Bable. Esti trabayu apurre interesantes novedaes pa la hestoria del idioma asturianu nun periodu que nun taba hasta agora estudiáu con fondura. Ente elles, la presencia del asturianu nes visites de Franco a Asturies, o la celebración d'una misa en llingua asturiana nel Palaciu del Pardo, en Madrid, con motivu de los cincuenta años del so matrimoniu cola asturiana Carmen Polo.
Inaciu Galán (Xixón, 1986) ye periodista, profesor, diplomáu en Turismu y Especialista en Xestión Cultural, y Doctor n'Humanidaes pola Universidá d'Uviéu (2020) cola tesis «La llingua asturiana nel Franquismu», que foi calificada con Sobresaliente cum laude y propuesta a Premiu Estraordinariu de Doctoráu. Tien un Máster en «Sociedá de la Información y el Conocimientu» na Universitat Oberta de Catalunya y ta formáu como profesor na especialidá d'asturianu col Máster de Formación del Profesoráu. Persona perconocía nos ámbitos de la reivindicación llingüística asturiana, el so trabayu ye descomanáu en munchos campos d'actividá: como periodista, como escritor y articulista codalosu, como comunicador y xestor cultural, como tornador políglota, como profesor de llingua, como editor, como investigador y como direutivu de Iniciativa pol Asturianu. En cuasi toes estes actividaes algamó la escelencia, atropando premios de milenta instituciones y organizaciones. Ye miembru del Colexu Profesional de Periodistes d'Asturies dende la so fundación, presentó programes de radio y televisión, na TPA y na cadena SER, recibiendo en 2005 el Premiu «Enriqueta González Rubín» de Periodismu, otorgáu pol Gobiernu del Principáu d'Asturies y tamién el Premiu «Moscones en Xixón» de Periodismu. Collabora con una sección d'opinión na RPA, nel diariu El Comercio, na revista cultural Vërtigu y na Voz de Asturias. En 2017 cofundó CuatroGotes Producciones, empresa dedicada al audiovisual, la comunicación, el márketing, la edición y la xestión cultural y d'eventos. Xunto a esta productora torna a la TPA en 2018 col programa Mundu Sidreru, como director y presentador. Puxó pola modernización del monólogu espublizando dos antoloxíes del monólogu modernu con testos propios y de nuevos autores. Como articulista, escritor y traductor tien collaborao con más de una docena de revistes, y testos de so foron esbillaos pa delles antoloxíes. Algamó más de 15 premios como lliteratu en concursos de poesía, monólogu, microrellatu y rellatu curtiu, como'l «Fernán Coronas» de poesía de 2016. Agora mesmo ta a piques de sacar el llibru de rellatos «Cartes nel horru (y delles hestories más)». Tien espublizaes en delles revistes tornes al asturianu d'obres en gallegu, castellán, catalán, inglés o francés, ente les que sorrayamos la obra pa la reciella de Madonna, "The English Roses". En 2012 estrenóse tamién nel campu de la lliteratura infantil col llibru «Nel, el coríu que nun sabía nalar» y en 2016 asoleyó'l so primer poemariu «Tierra podre» con Ediciones Camelot. Ente la so producción rescampla tamién el primer diccionariu d'asturianu con una llingua estranxera, el Diccionariu básicu asturianu-inglés / inglés-asturianu, asina como un cartafueyu de Terminoloxía de Turismu con alredor de 900 términos d'esti sector pal Centru de Terminoloxía Asturianu, TermAst. Fundó en 2006 la revista lliteraria Formientu, que dirixó hasta 2017 y pela que pasaron cuasi un cientu d'autores mozos asturianos, lleoneses y mirandeses… qu'usen la llingua asturiana nes sos composiciones. Participa como profesor en cursos de xestión cultural de la Universidá Asturiana de Branu (UABRA) y dirixe'l programa de cursos d'Iniciativa pol Asturianu. En 2016 entamó'l so llabor na docencia oficial nel IES númberu 5 d'Avilés pasando darréu per otros centros en Xixón y La Pola Siero. Como investigador, algamó dellos premios, como'l de l'Academia «Concursu de recoyida de material toponímico» pol trabayu sobre la «Toponimia de La Collá (Siero)». N'otros concursos d'investigación algamó tamién cuatro accésits, como el de 2009 pol estudiu «Amuesa de publicidá en llingua asturiana». Dio conferencies nes universidaes de Barcelona, Uviéu, Aveiro y Oxford, amás de n'otros espacios, como güei nel Atenéu Obreru de Xixón, onde repite.
Esta actividá enmarcase dientro de la collaboración ente les entidades del Atenéu Obreru de Xixón y de ÁSTURA, pa faer una actividá mensual de promoción de la cultura asturiana.
La entrada ye llibre.
