martes 24 de marzo de 2020 - 19h30
¿Prohibióse l'asturianu nel Franquismu? La llingua asturiana na dictadura
Conferencia: "¿Persiguióse l'asturianu nel Franquismu? Repás hestóricu a la situación de la llingua asturiana na dictadura"
Embaxo'l títulu «¿PERSIGUIÓSE L'ASTURIANU NEL FRANQUISMU?», Inaciu Galán va afondar na situación de la llingua asturiana nel periodu de la dictadura de Francisco Franco, faciendo un repás a la ideoloxía que'l franquismu construyó sobre la so idea d'España en rellación a les llingües del estáu y l'aplicación qu'ello tuvo na llexislación creada pa la xestión y represión d'esta realidá multillingüe.
La conferencia va tar basada na so tesis «La llingua asturiana nel Franquismu», que foi reconocida con Sobresaliente cum laude y ta propuesta a Premiu Estraordinariu de Doctoráu, onde apaecen casos qu'ilustren la represión llingüística xeneralizada que se vivió nes escueles demientres la dictadura. Ye tamién tema d'estudiu'l papel del Instituto de Estudios Asturianos (IDEA), asina como la situación de la lliteratura escrita n'asturianu, mesmo n'Asturies que nel exiliu. Sobre la etapa última del Franquismu, la tesis fai una revisión del papel de l'asociación Amigos del Bable, fundada en 1969 y pieza clave pa entender l'apaición en 1974 del asturianismu modernu que supón Conceyu Bable.
Esti trabayu apurre interesantes novedaes pa la hestoria del idioma asturianu nun periodu que nun taba hasta agora estudiáu con fondura. Ente elles, la presencia del asturianu nes visites de Franco a Asturies, o la celebración d'una misa en llingua asturiana nel Palaciu del Pardo, en Madrid, con motivu de los cincuenta años del so matrimoniu cola asturiana Carmen Polo.
Inaciu Galán (Xixón, 1986) Doctor pola Universidá d'Uviéu cola tesis "La llingua asturiana nel Franquismu", Máster en Sociedá de la Información y el Conocimientu na UOC, Grau en Periodismu pola UDIMA, Especialista n'asturianu nel Máster de Profesoráu, Diplomáu en Turismu y Especialista en Xestión Cultural pola Universidá d'Uviéu. Trabayó en medios como la Cadena Ser, Onda Peñes, Asturnews... Dende 2007 presenta programes na TPA, como Xente de casa y el recién Mundu Sidreru en TPA. De 2012 a 2019 foi presidente de la ONG Iniciativa pol Asturianu, lo que compaxinó cola dirección de la revista lliteraria Formientu, el trabayu como profesor en dellos cursos, xestor cultural, amás d'otres xeres profesionales, culturales y reivindicatives. Dende 2016 exerce como profesor de llingua asturiana y lliteratura n'institutos. En 2017 punxo en marcha Cuatro Gotes Producciones, onde dirixe proyectos como la plataforma de youtubers n'asturianu PlayPresta.
Organizado por Manglar
