jueves 19 de mayo de 2022 - 19h30
Presentación del llibru "Díes otros"
Presentación del llibru "Díes otros" cola so escritora, Laura Marcos y Mónica Jimenez la illustradora de la obra. Xueves 19 a les 19:30H nel CSA La Semiente.
Laura Marcos ye escritora y traductora n'asturianu. Como poeta tien visitao La Semiente munches veces dende l'entamu, nes munches timbes poétikes y micros abiertos que se ficieron dende'l 2011. En 2017 publicó'l llibru Cuentos de ser y de tar y en 2019 ganó'l Premiu Fernán Coronas de Poesía con Díes otros, el poemariu que vien a presentanos equí. Esti ye un poemariu una plizquina distintu a la poesía timbera, más oral y más directa. Nestos versos curtios y condensaos, onde les palabres se destilen pa concentrase y cargase de sentíu, esplórense distintes esperiencies de perda, de duelu y recuperación ente una realidá que nunca apara.
Mónica Jiménez, ilustradora d'esti llibru, ye artista, diseñadora y promotora d'igualdá. La so filosofía ye l'artivismu, arte pa concienciar sobre les inxusticies, celebrar a quien llucha contra elles y en definitiva meyorar la vida de les persones. Asina fue llevando la so esposición "Indispensables", una colección de pintura y ilustración, por distintes sales d'Asturies; y tamién lleva, cola so iniciativa "Arte por los barrios", colecciones más pequeñes que s'esponen en tiendes de tou tipu (tienda de teles, centru de masaxes, llibrería,...) onde pue llegar a tou tipu de públicu.
