Axenda Mazucu

Conferencia: "La urbanización del asturiano"

CONFERENCIA D'ÁSTURA DEL MES DE XUNU:
FRANCISCO LLERA RAMO
El nuestru invitáu pa la conferencia de xunu ye'l doctor en Socioloxía y catedráticu de Ciencia Política de la Universidá del País Vascu FRANCISCO LLERA RAMO, fundador y direutor del Euskobarómetro. Investigador del comportamientu políticu y eleutoral, la cultura política y la opinión pública, ente la so peramplia investigación dirixó les encuestes sociollingüístiques d'Asturies, tanto les cuatro de conxuntu del país, como les trés del Navia-Eo y la del conceyu de Xixón. Col títulu de "LA URBANIZACIÓN DEL ASTURIANU" va esponenos la realidá científica actual de la llingua nes trés ciudaes más importantes, Uviéu, Xixón y Avilés.

Esti mes la conferencia treslládase al tercer martes, día 18.
-------------
Atenéu Obreru de Xixón
Antigua Escuela Comerciu, 2ª planta
19:00 hores

El martes 18 de xunu, a les 19H.00', nel llocal social del Atenéu Obreru de Xixón (Cai Francisco Tomás y Valiente, 1-2ª Planta), Ástura organiza una conferencia sobre La urbanización del asturiano, a cargu de Francisco Llera Ramo.

Esta actividá ye una collaboración ente les entidaes Atenéu Obreru de Xixón y ÁSTURA, pa facer una actividá mensual en torno a la promoción de la cultura asturiana.

Esta conferencia tráinos los resultaos del últimu estudiu sociollingüísticu sobre la realidá del asturianu nel área metropolitana d'Avilés, Uviéu y Xixón con conclusiones dafechamente positives y esperanzadores. Vamos ver cómo l'asturianu tien una gran vitalidá nel mediu urbanu, con una presencia que medró significativamente dende'l primer estudiu del añu 1991, hasta ocupar un espaciu relevante nes ciudaes. Ciertu ye que'l dominiu del castellán amenorga la llingua apurriéndo-y la so debilidá estructural, fechu qu'esixe un mayor esfuerzu individual y unes ferramientes públiques de normalización pa llograr tanto una dixebra clara de los dos rexistros como la plena funcionalidá comunicativa. Y, pa la nuesa sorpresa, ye Avilés la villa que sobresal nos niveles de competencia n'asturianu. Somos una sociedá billingüe que tien de trabayar pol fin de la diglosia col castellán, aumentar l'usu efeutivu del asturianu y reclamar les midíes llegales afayadices pa la so pervivencia n'igualdá de condiciones. La conferencia va esmenuzanos perbién los datos d'esta investigación y les perbones resultancies llograes. Ye la última cita d'esti décimu cursu, un verdaderu honor recibir a Francisco Llera.

Francisco Llera Ramo ye doctor en Socioloxía y catedráticu de Ciencia Política de la Universidá del País Vascu, fundador y direutor del Euskobarómetru. Investigador del comportamientu políticu y eleutoral, la cultura política y la opinión pública, ente les sos peramplies investigaciones dirixó les encuestes sociollingüístiques d'Asturies, tantu les cuatro de conxuntu del país, como les trés del Navia-Eo y la del conceyu de Xixón, ente otres rellacionaes cola llingua. Profesor en Yale, en Georgetown o na Universidá Pablo de Olavide de Sevilla, ta en posesión d'importantes reconocencies públiques y privaes pola so relevancia científica y social. Foi presidente o miembru de numberoses instituciones, ente elles tamién ye académicu de númberu de la Academia de la Llingua Asturiana dende l'añu 1994. Frutu de les sos principales llinies d'investigación (el comportamientu políticu y eleutoral, la cultura política, la violencia política y el terrorismu, la opinión pública…) son les sos numberoses ponencies en Congresos nacionales ya internacionales, asina como una parte importante de los sos proyeutos y publicaciones: una docena de tesis doctorales, más de 20 proyeutos d'investigación (investigador principal en 13), autor/coautor/editor de 26 llibros, más de 70 capítulos en llibros coleutivos, 90 artículos científicos, más de 100 contribuciones en congresos nacionales ya internacionales y más de 200 artículos de prensa. Nel ámbitu del terrorismu y la seguridá, ye miembru del Patronatu de la Fundación de Víctimes del Terrorismu y conferenciante habitual de los cursos d'Altu Estáu Mayor y de l'Academia Militar Xeneral, lo mesmo que del Centru Superior d'Estudios de la Defensa, o de los Cursos d'Ascensu a Comisariu Principal del CNP y otros del CNI, Guardia Civil, o sobre'l terrorismu en xeneral. La cuestión de la violencia y el terrorismu d'ETA foi oxetu de la so docencia nuna gran variedá de cursos y seminarios, amás, en distintes Universidaes, tantu nacionales como estranxeres. Fai escasamente un mes foi escoyíu presidente del Movimientu 25 de Mayu, organización ciudadana tresversal, que tien como oxetivu la defensa de la identidá y del futuru d'Asturies, que celebró'l so actu fundacional na sala capitular de la catedral d'Uviéu, el mesmu espaciu onde la Xunta Xeneral de 1808 declaró la guerra a Francia, proclamó la soberanía d'Asturies, unvió embaxadores a Inglaterra en busca d'ayuda internacional y llevantó un exércitu de 20 000 patriotes.